ବୁଗୁଡା -:ବୁଗୁଡ଼ା-ବାଲିପଦର ମୁଖ୍ୟ ରାସ୍ତାର ବାଙ୍କେଶ୍ୱରୀ ମନ୍ଦିର ନିକଟରେ ଆଜି ସକାଳ ପ୍ରାୟ ୯ଟା ସମୟରେ ବାଇକ ଓ ଟିଭିଏସ ଆକ୍ସିଲର ମୁହାଁ ମୁହିଁ ଧକ୍କା ହେବା ଫଳରେ ୨ ଜଣକ ମୃତ୍ୟୁ ଘଟିଥିବା ବେଳେ ଜଣେ ଆହତ ହୋଇଛନ୍ତି l ମୃତକ ୨ ଜଣଙ୍କ ମଧ୍ୟରୁ ଜଣେ ଓଡ଼ଗାଁ ଥାନା ଅନ୍ତର୍ଗତ ନୃସିଂହ ପ୍ରସାଦ ଗ୍ରାମର କାଳିଆ ମାହାଙ୍କୁଡଙ୍କ ପୁଅ ଦିପୁ ମାହାଙ୍କୁଡ (୨୩ ) ଏବଂ ଅନ୍ୟ ଜଣକ ବୁଗୁଡ଼ା ଥାନା ଅନ୍ତର୍ଗତ ପଙ୍କଳସାହି ଗ୍ରାମର ଆକ୍ସିଲ ଚାଳକ ଶଙ୍କର ଡାକୁଆଙ୍କ ପୁଅ ଅଜୟ ଡାକୁଆ(୧୯ ) ହୋଇଥିବା ବେଳେ ଆହତ ଜଣକ ମୃତ ଦିପୁଙ୍କ ଭାଇ ପପୁ ମାହାଙ୍କୁଡ଼(୨୦) l ଘଟଣାରୁ ପ୍ରକାଶ ଯେ , ଏକ ୟୁନିକର୍ଣ୍ଣ ବାଇକ (ନଂ – ଓଡି-୨୫ ଏଲ ୬୨୦୧) ଯୋଗେ ଦିପୁ ଓ ପପୁ ବ୍ରହ୍ମପୁର ଅଭିମୁଖେ ଯାଉଥିବା ବେଳେ ଅନ୍ତରପଡା ପଞ୍ଚାୟତର ମାଣିବନ୍ଧ ଗ୍ରାମରୁ ବୁଗୁଡ଼ା ଅଭିମୁଖେ ଏକ ଆକ୍ସିଲ ମୋପେଡରେ ଆସୁଥିବା ଅଜୟ ସହ ମୁହାଁମୁହିଁ ଧକ୍କା ହୋଇଥିଲା ଫଳରେ ଉଭୟ ଗାଡିର ଚାଳକ ଦିପୁ, ଓ ଅଜୟ ଗୁରୁତର ଆହତ ହୋଇଥିଲେ l ପଛରେ ଅନ୍ୟ ଏକ ବାଇକରେ ଯାଉଥିବା ପପୁଙ୍କ ଭାଇ ସଞ୍ଜୟ ସ୍ଥାନୀୟ ଲୋକଙ୍କ ସହାୟତାରେ ଆମ୍ବୁଲାନ୍ସ ଯୋଗେ ଆହତଙ୍କୁ ବୁଗୁଡ଼ା ମେଡିକାଲରେ ଭର୍ତ୍ତି କରିଥିଲେ । ତେବେ ଦିପୁଙ୍କୁ ଡାକ୍ତର ମୃତ ଘୋଷଣା କରିଥିବା ବେଳେ ଅଜୟଙ୍କୁ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଥିଲା l ସେଠାରେ ଚିକିତ୍ସାଧୀନ ଅବସ୍ଥାରେ ଅପରାହ୍ନରେ ଅଜୟଙ୍କ ମୃତ୍ୟୁ ଘଟିଥିବା ଜଣା ପଡିଛି l ଆହତ ପପୁ ଏବେ ବିପଦ ମୁକ୍ତ ଥିବା ଡାକ୍ତର କହିଛନ୍ତି l ଖବରପାଇ ପୋଲିସ ଘଟଣା ସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ଗାଡି ଦୁଇଟିକୁ ଜବତ କରିବା ସହ ଶବକୁ ବ୍ୟବଛେଦ ପାଇଁ ପଠାଇ ତଦନ୍ତ ଚଳାଇଥିବା ଜଣାପଡିଛି l
