ବୁଗୁଡ଼ା : ତା ୧୭/୦୬/୨୩ : ବୁଗୁଡ଼ା ଥାନା ବାଲିପଦର ଫାଣ୍ଡି ଅନ୍ତର୍ଗତ ଖରିଡା ଗ୍ରାମର ଜଣେ ଯୁବକକୁ ବୋତଲରେ ଆକ୍ରମଣ କରିବା ଅଭିଯୋଗରେ ବାଲିପଦର ଫାଣ୍ଡି ଅଧିକାରୀ ସମୀର ବେହେରା ଆଜି ଦୁଇ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାଯାଇଛି । ଗିରଫ ଦୁଇ ଜଣ ହେଲେ ଖରିଡା ଗ୍ରାମର ଅକ୍ଷୟ ସ୍ବାଇଁ ଓ ରଞ୍ଜନ ଭୂୟାଁ । ଏ ନେଇ ବୁଗୁଡା ଥାନାରେ କେସ୍ ନଂ ୪୨୫/୨୩ ରେ ଏକ ମାମଲା ରୁଜୁ ହୋଇଥିବା ଆଇଆଇସି ଚିତ୍ତରଞ୍ଜନ ବେହେରାଙ୍କ ଠାରୁ ପ୍ରକାଶ ପାଇଛି । ପ୍ରକାଶ ଯେ , ପୂର୍ବରୁ ଏକ ବାହାଘର ଉତ୍ସବରେ ଖରିଡା ଗ୍ରାମର ବିନୋଦ ବିଷୋୟୀଙ୍କ ସହ ଅକ୍ଷୟ ଓ ରଞ୍ଜନଙ୍କ ଗଣ୍ଡଗୋଳ ହୋଇଥିଲା । ଗତକାଲି ରାତିରେ ଏକଡାଳ ଗାଁର ଏକ ଜାଗାରେ ବସି ଅକ୍ଷୟ ଓ ରଞ୍ଜନ ମଦ୍ଯପାନର ଆସର ଜମାଇ ଜମିଜମା ବିଷୟରେ ଆଲୋଚନା କରୁଥିଲେ । ଏ ସମୟରେ ବିନୋଦ ଯାଇ ସେଠାରେ ପହଞ୍ଚିଥିଲେ । ପୂର୍ବ ଶତ୍ରୁତାକୁ କେନ୍ଦ୍ର କରି ବିନୋଦଙ୍କ ସହ ଅକ୍ଷୟ ଓ ରଞ୍ଜନର ପ୍ରବଳ ଯୁକ୍ତିତର୍କ ହୋଇଥିଲା। ଏଥିରେ ରାଗି ଯାଇ ଅକ୍ଷୟ ଓ ରଞ୍ଜନ ବିଅର୍ ବୋତଲରେ ବିନୋଦର ମୁଣ୍ଡକୁ ଆକ୍ରମଣ କରିଥିଲେ । ଫଳରେ ବିନୋଦର ମୁଣ୍ଡ ଫାଟି ରକ୍ତସ୍ରାବ ହୋଇଥିଲା ଏବଂ ସେ ବାଲିପଦର ମେଡିକାଲରେ ଚିକିତ୍ସିତ ହୋଇ ଫାଣ୍ଡିରେ ଉଭୟଙ୍କ ବିରୁଦ୍ଧରେ ଅଭିଯୋଗ କରିଥିଲେ ।
