ଭୁବନେଶ୍ୱର : ପୂର୍ବତନ ମନ୍ତ୍ରୀ ନବ ଦାସଙ୍କ ହତ୍ୟାକୁ ନେଇ ପୁଣିଥରେ ରାଜନୀତି ଜୋର ଧରିଛି । ଏହି ହତ୍ୟାକାଣ୍ଡ ମାମଲାରେ ଅଭିଯୁକ୍ତ ଗୋପାଳ ଦାସ ଅଦାଲତରେ ହାଜର ହେବାପରେ ଉଭୟ ବିଜେପି ଓ କଂଗ୍ରେସ ପକ୍ଷରୁ କ୍ରାଇମବ୍ରାଞ୍ଚର ଚାର୍ଜସିଟ୍କୁ ନେଇ ବୟାନବାଜି ଆରମ୍ଭ ହୋଇଛି ।
ବିଜେପି ସାଂସଦ ସୁରେଶ ପୂଜାରୀ ଆଜି ଏହି ହତ୍ୟାକାଣ୍ଡ ଘଟଣାର ରହସ୍ୟ ଉପରୁ ପରଦା ଉଠାଇବାରେ ପୁଲିସ୍ ବିଫଳ ହୋଇଥିବା କହିଛନ୍ତି । ସେ କହିଛନ୍ତି ଯେ ପୁଲିସ୍ ରହସ୍ୟ ଉନ୍ମୋଚନ ଅପେକ୍ଷା ଏହାକୁ ଘୋଡାଇବାକୁ ଅଧିକ ଚେଷ୍ଟା କରିଛି । ବର୍ତ୍ତମାନ ସୁଦ୍ଧା ଯେଉଁ ଗୁଳିରେ ନବ ଦାସଙ୍କ ହତ୍ୟା କରାଯାଇଥିଲା ତାହାକୁ ପୁଲିସ୍ ଠାବ କରିପାରି ନାହିଁ ।
ସେହିଭଳି ପ୍ରଦେଶ କଂଗ୍ରେସ ପ୍ରଚାର କମିଟି ଅଧ୍ୟକ୍ଷ ବିଜୟ ପଟ୍ଟନାୟକ କହିଛନ୍ତି ଯେ ନବ ଦାସଙ୍କ ଭଳି ଜଣେ ବରିଷ୍ଠ କ୍ୟାବିନେଟ୍ ମନ୍ତ୍ରୀଙ୍କୁ ଜଣେ ଏଏସ୍ଆଇ ଏତେ ସହଜରେ ହତ୍ୟା କରିବ ତାହା ବିଶ୍ୱାସ କରିହେଉ ନାହିଁ । ଏହା ପଛରେ କିଛି ନା କିଛି ଷଡଯନ୍ତ୍ର ରହିଛି ଯାହାକୁ ପୁଲିସ୍ ତଦନ୍ତ ପରିସରକୁ ନେଇ ନାହିଁ ।
ତେବେ ଝାରସୁଗୁଡା ନଗର ବିଜେଡି ସଭାପତି ସନ୍ଦିପ ଅଗସ୍ତି କିନ୍ତୁ କ୍ରାଇମବ୍ରାଞ୍ଚ ସବୁ ଦିଗରୁ ତଦନ୍ତ କରି ରିପୋର୍ଟ ଦେଇଥିବା କହିଛନ୍ତି ।
