ବୁଗୁଡା:୦୯/୦୮/୨୩ ବୁଗୁଡ଼ା ସହର ଏବଂ ଆଖପାଖରେ ଛାତ୍ରୀଙ୍କୁ ନାନାଦି ହଇରାଣ ହରକତ କରୁଥିବା ରୋଡ ରୋମିଓମାନଙ୍କୁ ସାବାଡ଼ କରିବା ପାଇଁ ପୋଲିସ ଅଭିଯାନ ଚଳାଇ ଥିବାବେଳେ ଆଜି ପୁଣି ୭ ଜଣ ରୋମିଓ ଏବଂ ୪ ଜଣ ନାବାଳିକା କଲେଜ ଛାତ୍ରୀଙ୍କୁ ଧରିବା ପରେ ସେମାନଙ୍କ ଅଭିଭାବକମାନଙ୍କୁ ଥାନାକୁ ଡକାଇ ତାଗିଦ୍ କରି ଛାଡିଥିବା ପୋଲିସ ସୂଚନା ଦେଇଛି l ଆଜି ନିକଟସ୍ଥ ଶୈବପୀଠ ବୁଦ୍ଧଖୋଲରୁ ୪ ଜଣ ନାବାଳିକା କଲେଜ ଛାତ୍ରୀ ଓ ୪ ଜଣ ରୋମିଓଙ୍କୁ ଧରିଥିବା ବେଳେ ସନ୍ଧ୍ୟା ସମୟରେ ପଞ୍ଚାଗଳିରେ ବାଇକରେ ଚକର କାଟି ଟ୍ୟୁସନକୁ ଯାଉଥିବା ଛାତ୍ରୀଙ୍କୁ କମେଣ୍ଟ ମାରୁଥିବା ବେଳେ ୩ ଜଣ ରୋମିଓଙ୍କୁ ପୋଲିସ ଧରିଥିଲା l ଧରା ପଡ଼ିଥିବା ସମସ୍ତ ରୋମିଓ ବୁଗୁଡ଼ା ସହର ସମେତ ଗୋଲିଆ, ଗୌଡ଼ିଆବରୋଦା ଓ ବିରଞ୍ଚିପୁର ଗ୍ରାମର ହୋଇଥିବା ବେଳେ ନାବାଳିକା ଛାତ୍ରୀମାନେ ଘରେ ଟ୍ୟୁସନ୍ ଯାଉଛୁ କହି ବୁଦ୍ଧଖୋଲ ଆସିଥିଲେ ବୋଲି ପୋଲିସ ସୂଚନା ଦେଇଛି lବୁଗୁଡା ଥାନା ଅଧିକାରୀ ଚିତ୍ତ ରଞ୍ଜନ ବେହେରାଙ୍କ ନିର୍ଦ୍ଦେଶରେ ଏସ୍ଆଇ ସମୀର କୁମାର ସେଠୀଙ୍କ ନେତୃତ୍ଵରେ ପୋଲିସ ଟିମ୍ ସହରର ବିଭିନ୍ନ ଗଳି କନ୍ଦି ଓ ନୂଆଁ ବସଷ୍ଟାଣ୍ଡରେ ଚଡାଉ କରି ରୋଡ ରୋମିଓମାନଙ୍କୁ ଛେଚିବା ସହ ଗତ ୩ ଦିନ ମଧ୍ୟରେ ୧୨ ଜଣ ଯୁବକଙ୍କୁ ଧରି ସେମାନଙ୍କ ଠାରୁ ୭ ଟି ବାଇକ୍ ଜବତ୍ କରିଥିଲା । ପୋଲିସ ପ୍ରଶାସନ ପକ୍ଷରୁ ଏଭଳି ଧରପଗଡ ଦ୍ବାରା ରୋଡ ରୋମିଓଙ୍କ ମଧ୍ୟରେ ଛନକା ପଶିଥିଲେ ହେଁ ଟ୍ୟୁସନ ଓ କଲେଜ ଯିବା ବାହାନାରେ ନାବାଳିକା ଛାତ୍ରୀମାନେ ଘରୁ ଗୋଡ଼ କାଢି ଅନ୍ୟତ୍ର ଯାଉଥିବାରୁ ଅଭିଭାବକମାନେ ଏଥି ପ୍ରତି ନଜର ରଖିବାକୁ ପୋଲିସ ପକ୍ଷରୁ ସଚେତନତା କରାଯାଇଛି l
