ନୂଆଦିଲ୍ଲୀ : ସେପ୍ଟେମ୍ବର ୧୬ରେ ହାଇଦ୍ରାବାଦରେ ନବଗଠିତ ସିଡବ୍ଲ୍ୟୁସିର ଏକ ବୈଠକ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଡାକିଛନ୍ତି ବୋଲି ଏଆଇସିସି ସାଧାରଣ ସମ୍ପାଦକ କେସି ବେଣୁଗୋପାଳ ସୋମବାର ସୂଚନା ଦେଇଛନ୍ତି ।
ଅଖିଳ ଭାରତୀୟ କଂଗ୍ରେସ କମିଟି ମୁଖ୍ୟାଳୟରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ବେଣୁଗୋପାଳ କହିଛନ୍ତି ଯେ ସେପ୍ଟେମ୍ବର ୧୭ରେ ଏକ ସମ୍ପ୍ରସାରିତ କଂଗ୍ରେସ କାର୍ଯ୍ୟକାରିଣୀ କମିଟି (ସିଡବ୍ଲ୍ୟୁସି) ବୈଠକ ଅନୁଷ୍ଠିତ ହେବ ଏବଂ ଏଥିରେ ସମସ୍ତ ପ୍ରଦେଶ କଂଗ୍ରେସ କମିଟି ମୁଖ୍ୟଙ୍କୁ ସାମିଲ କରାଯିବ ।
ସେପ୍ଟେମ୍ବର ୧୭ ସନ୍ଧ୍ୟାରେ ହାଇଦ୍ରାବାଦ ନିକଟରେ ଏକ ରାଲି ଅନୁଷ୍ଠିତ ହେବ, ଯେଉଁଠାରେ ଦଳ ତେଲେଙ୍ଗାନାରେ ଆଗାମୀ ବିଧାନସଭା ନିର୍ବାଚନ ପାଇଁ ନିଜର ଗ୍ୟାରେଣ୍ଟି ଘୋଷଣା କରିବ ବୋଲି ବେଣୁଗୋପାଳ କହିଛନ୍ତି ।
ଅଗଷ୍ଟ ୨୦ ତାରିଖରେ କଂଗ୍ରେସ ମୁଖ୍ୟ ଖଡଗେ ସିଡବ୍ଲ୍ୟୁସିର ପୁନର୍ଗଠନ କରି ପୁରୁଣା ନେତାଙ୍କୁ ବଜାୟ ରଖିଥିଲେ ଏବଂ ଦଳର ୮୪ ଜଣିଆ ସର୍ବୋଚ୍ଚ ନିଷ୍ପତ୍ତି ଗ୍ରହଣକାରୀ ସଂସ୍ଥାରେ ଶଶି ଥରୁର ଏବଂ ଆନନ୍ଦ ଶର୍ମାଙ୍କ ଭଳି ଜି-୨୩ ଗୋଷ୍ଠୀର ପ୍ରମୁଖ ନେତାଙ୍କୁ ସାମିଲ କରିଥିଲେ ।
ଖଡଗେ ଦାୟିତ୍ୱ ନେବାର ୧୦ ମାସ ପରେ ଗଠିତ ଏହି ଗୁରୁତ୍ୱପୂର୍ଣ୍ଣ ସିଡବ୍ଲ୍ୟୁସିରେ ୩୯ ଜଣ ନିୟମିତ ସଦସ୍ୟ, ୩୨ ଜଣ ସ୍ଥାୟୀ ନିମନ୍ତ୍ରିତ ସଦସ୍ୟ ଏବଂ ୧୩ ଜଣ ସ୍ୱତନ୍ତ୍ର ନିମନ୍ତ୍ରିତ ସଦସ୍ୟ ରହିଛନ୍ତି । ଏମାନଙ୍କ ମଧ୍ୟରେ ୧୫ ଜଣ ମହିଳା ଏବଂ ସଚିନ ପାଇଲଟ ଓ ଗୌରବ ଗୋଗୋଇଙ୍କ ଭଳି ଅନେକ ନୂଆ ଚେହେରା ନିୟମିତ ସଦସ୍ୟ ଅଛନ୍ତି ।
