ଜୟପୁର ; ବୈପାରିଗୁଡା ପୁଲିସ ଏକ ସ୍କର୍ପିଓ କାର୍ ସହ ୫୮ କିଲୋ ୨ ଶହ ଗ୍ରାମ ଗଞ୍ଜେଇ ଜବତ କରିଥିବା ଜଣାପଡ଼ିଛି। ସୂଚନା ଅନୁଯାୟୀ ବୈପାରିଗୁଡା ଥାନା ଅନ୍ତର୍ଗତ ମାଙ୍କିଡି ଗ୍ରାମ ଆଡୁ ମାଛକୁଣ୍ଡ ଦେଇ ଆନ୍ଧ୍ରପ୍ରଦେଶକୁ ଏକ ସ୍କର୍ପିଓ କାର୍ (ଏପି ୨୮ ଡିଏସ ୯୩୬୯) ଯୋଗେ ଗଞ୍ଜେଇ ଚୋରା ଚାଲାଣ କରାଯାଉଥିବା ବିଶେଷ ସୂତ୍ରରୁ ଖବର ମିଳିଥିଲା।
ଏହାପରେ ବୈପାରିଗୁଡା ପୁଲିସ ୩ଟି ଟିମ୍ ଗଠନ କରି ମାଙ୍କିଡି ଗ୍ରାମ ଅଭିମୁଖେ ବାହାରିଥିଲେ। ପୁଲିସର ୩ଟି ଟିମ୍ ଛପି ଜଗିଥିବା ସମୟରେ ସେହି ରାସ୍ତା ଦେଇ ଆସୁଥିବା ସ୍କର୍ପିଓ କାରକୁ ଅଟକାଇବା ପାଇଁ ଚେଷ୍ଠା କରିଥିଲେ। କିନ୍ତୁ ପୁଲିସକୁ ଦେଖି ଗଞ୍ଜେଇ ମାଫିଆ ମାନେ ଦ୍ରୁତ ଗତିରେ କାରକୁ ନେଇ ମାଛକୁଣ୍ଡ ରାସ୍ତାକୁ ବାହାରିବାକୁ ଚେଷ୍ଟା କରିଥିଲେ। କାରକୁ ପିଛା କରିବା ପରେ ଗଞ୍ଜେଇ ମାଫିଆ ମାନେ ମାଙ୍କିଡି ଘାଟି ଉପରେ କାରରୁ ଓହ୍ଲେଇ ଅନ୍ଧାରର ସୁଯୋଗ ନେଇ ଜଙ୍ଗଲ ଭିତରକୁ ଦୌଡ଼ି ପଳାଇଥିଲେ। କାରକୁ ଯାଞ୍ଚ କରିବା ପରେ ସେଥିରୁ କିଛି ପାଇନଥିବାରୁ ପୁନର୍ବାର ଟିକିନିଖି ଯାଞ୍ଚ କଲାପରେ କାରରେ ଏକ ଚୋରା କେବିନ୍ ତିଆରି କରି ସେଥିରେ ଗଞ୍ଜେଇ ରଖିଥିଲେ।
କାରକୁ ଜବତ କରିବା ସହ ଥାନାରେ ଆଣି ଅତିରିକ୍ତ ମାଜିଷ୍ଟ୍ରେଟ ଝଦେଶ୍ବର ସୌରାଙ୍କ ଉପସ୍ଥିତିରେ ଓଜନ କରିବାରୁ ୫୮ କିଲୋ ୨ ଶହ ଗ୍ରାମ ଥିବା ଜଣାପଡ଼ିଥିବା ବୈପାରିଗୁଡା ଥାନା ଆଇଆଇସି ଅନିତା ନାୟକ ସୂଚନା ଦେଇଥିଲେ।
