ଭୁବନେଶ୍ୱର : ଆସନ୍ତା ସାଧାରଣ ନିର୍ବାଚନ ପାଇଁ ଆଜି ଏଆଇସିସି ମୁଖ୍ୟାଳୟ ଦିଲ୍ଲୀ ଠାରେ ଅଖିଳ ଭାରତ ଜାତୀୟ କଂଗ୍ରେସର ସଭାପତି ମଲ୍ଲିକାର୍ଜ୍ଜୁନ ଖଡ଼ଗେଙ୍କ ସଭାପତିତ୍ୱରେ ପୂର୍ବତନ କଂଗ୍ରେସ ସଭାପତି ତଥା ସାଂସଦ ରାହୁଲ ଗାନ୍ଧୀ, ସାଂସଦ ଶ୍ରୀ କେସି ଭେନୁ ଗୋପାଳ, ଓଡ଼ିଶା ପ୍ରଭାରୀ ସାଂସଦ ଡ. ଏ ଚେଲ୍ଲା କୁମାରଙ୍କ ସହିତ ଓଡ଼ିଶାର ବହୁ ବରିଷ୍ଠ କଂଗ୍ରେସ ନେତୃବୃନ୍ଦ ମାନଙ୍କର ଏକ ଗୁରୁତ୍ୱପୂର୍ଣ୍ଣ ବୈଠକ ହୋଇଥିଲା ।
ଆସନ୍ତା ସାଧାରଣ ନିର୍ବାଚନରେ ରାଜ୍ୟରେ କଂଗ୍ରେସ କ୍ଷମତା ଦଖଲ କରିବା ସହିତ କିଭଳି ଅଧିକ ସାଂସଦ ନିର୍ବାଚିତ ହେବେ ସେଥିପାଇଁ ଏଆଇସିସିର ନେତୃବର୍ଗ ରାଜ୍ୟ ନେତୃବର୍ଗଙ୍କ ସହ ବିଚାର ବିମର୍ଷ କରି ସ୍ୱତନ୍ତ୍ର ରଣନୀତି ପ୍ରସ୍ତୁତ କରାଯାଇଛି ।
ରାଜ୍ୟ କଂଗ୍ରେସ ସଭାପତି ଶରତ ପଟ୍ଟନାୟକଙ୍କ ସମେତ ଓଡ଼ିଶାର ସମସ୍ତ ନେତୃବର୍ଗ ଶ୍ରୀ ରାହୁଲ ଗାନ୍ଧୀ ତଥା ଶ୍ରୀ ଖଡ଼ଗେ ଏବଂ ପ୍ରିୟଙ୍କା ଗାନ୍ଧୀଙ୍କ ସମେତ ଅନ୍ୟ ବରିଷ୍ଠ କଂଗ୍ରେସ ନେତୃବୃନ୍ଦ ଅତିଶୀଘ୍ର ଓଡ଼ିଶାକୁ ଆସିବାପାଇଁ ନିମନ୍ତ୍ରଣ କରିଛନ୍ତି । ଶ୍ରୀ ଖଡ଼ଗେ, ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀଙ୍କ ସମେତ ଓଡ଼ିଶା ଆସିବା ପାଇଁ ସମ୍ମତି ଦେଇଛନ୍ତି ।
ଓଡ଼ିଶା ସଂଗଠନ ସହିତ ବହୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଦୀର୍ଘ ସମୟ ଧରି ଆଲୋଚନା ହୋଇଛି । ରାହୁଲ ଗାନ୍ଧୀ ଓଡ଼ିଶାର ଅନୁସୂଚିତ ଜାତି, ଜନଜାତି ତଥା ସଂଖ୍ୟାଲଘୁ ଏବଂ ପଛୁଆବର୍ଗଙ୍କ ସମେତ ଅର୍ଥନୈତିକ ଅନଗ୍ରସର ଶ୍ରେଣୀଙ୍କ ବିକାଶ ନିମନ୍ତେ କି ପଦକ୍ଷେପ ନିଆଯାଇଛି ଏବଂ କ’ଣ ସବୁ ପଦକ୍ଷେପ ନେଲେ ଓଡ଼ିଶାରେ ଏହି ବଡ଼ବର୍ଗଙ୍କର ବିକାଶ ଘଟିବ ସେଥିପାଇଁ ଏକ ସ୍ୱତନ୍ତ୍ର ଖସଡ଼ା ପ୍ରସ୍ତୁତ କରିବାପାଇଁ ରାଜ୍ୟ କଂଗ୍ରେସ ନେତୃବୃନ୍ଦଙ୍କୁ କହିଥିବାର ସୂଚନା ମିଳିଛି ।
