ଭୁବନେଶ୍ୱର : ମହିଳା ସ୍ୱୟଂ ସହାୟକ ଗୋଷ୍ଠୀ ପିଛା ବର୍ତ୍ତମାନ ଋଣ ପରିମାଣ ୩.୮୨ ଲକ୍ଷ ଟଙ୍କାକୁ ପାଉଛି । ଏହା ଏକ ସର୍ବକାଳୀନ ରେକର୍ଡ ।
ସରକାରୀ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ୨୦୨୩ ସେପ୍ଟେମ୍ବର ୩୦ ତାରିଖ ସୁଦ୍ଧା ୧,୫୦,୯୪୨ଟି ସ୍ୱୟଂ ସହାୟକ ଗୋଷ୍ଠୀକୁ ୫୭୬୩.୮୬ କୋଟି ଟଙ୍କାର ଋଣ ପ୍ରଦାନ କରାଯାଇଛି । ଯାହାର ହାରାହାରି ଋଣ ଆକାର ୩.୮୨ ଲକ୍ଷ ଟଙ୍କା ରହିଛି ।
ବିଗତ କିଛି ବର୍ଷ ମଧ୍ୟରେ ରାଜ୍ୟ ସରକାର ଏବଂ ଓଡ଼ିଶାର ବ୍ୟାଙ୍କିଙ୍ଗ୍ ଅନୁଷ୍ଠାନଗୁଡ଼ିକର ମିଳିତ ପ୍ରୟାସ ମହିଳା ସ୍ୱୟଂ ସହାୟକ ଗୋଷ୍ଠିକୁ ଋଣ ପ୍ରଦାନର ଗତିକୁ ଯଥେଷ୍ଟ ବୃଦ୍ଧି କରିଛି । ଏହି ସମନ୍ୱୟ ଫଳରେ ସ୍ୱୟଂ ସହାୟକ ଗୋଷ୍ଠୀଗୁଡ଼ିକ ଦ୍ୱାରା ଋଣ ବ୍ୟବହାରରେ ଉଲ୍ଲେଖନୀୟ ବୃଦ୍ଧି ଘଟିଛି, ଯାହା ଦ୍ୱାରା ସ୍ୱୟଂ ସହାୟକ ଗୋଷ୍ଠୀ (ଏସଏଚଜି)କୁ କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ (ଏସଏମଇ)ରେ ପରିଣତ କରିବାରେ ସକ୍ଷମ ହୋଇଛି ।
ବାର୍ଷିକ ଅଭିବୃଦ୍ଧି, ଉପଯୋଗ ଏବଂ ଠିକ୍ ସମୟରେ ଋଣ ପରିଶୋଧକୁ ଦୃଷ୍ଟିରେ ରଖି ଚଳିତ ଆର୍ଥିକ ବର୍ଷ ପାଇଁ ୪,୦୦,୦୦୦ ସ୍ୱୟଂ ସହାୟକ ଗୋଷ୍ଠୀକୁ ୧୫,୦୦୦.୦୦ କୋଟି ଟଙ୍କାର ସହାୟତା ପ୍ରଦାନ କରିବାକୁ ଲକ୍ଷ୍ୟ ରଖାଯାଇଛି । ଏହାବ୍ୟତୀତ ରବି ଫସଲ ଋତୁରେ ସ୍ୱୟଂ ସହାୟକ ଗୋଷ୍ଠୀଗୁଡ଼ିକୁ ଠିକ୍ ସମୟରେ, ପର୍ଯ୍ୟାପ୍ତ ଏବଂ ବାଧାମୁକ୍ତ ଋଣ ସହାୟତା ସୁନିଶ୍ଚିତ କରିବା ପାଇଁ ବ୍ୟାଙ୍କ ଶାଖାଗୁଡ଼ିକୁ ଋଣ ଆବେଦନ ସଂଗ୍ରହ, ଦସ୍ତାବିଜ୍ ଏବଂ ପ୍ରୋତ୍ସାହନ ପାଇଁ ୨୦୨୩ ନଭେମ୍ବର ଏବଂ ଡିସେମ୍ବର ମାସରେ ଏକ ସ୍ୱତନ୍ତ୍ର ଅଭିଯାନ କରାଯାଇଥିଲା ।
ସ୍ୱୟଂ ସହାୟକ ଗୋଷ୍ଠୀ କର୍ପସ୍ ର୍ନିବିଶେଷରେ ‘ମହିଳା ସ୍ୱୟଂ ସହାୟକ ଗୋଷ୍ଠି ଗୁଡ଼ିକୁ ସର୍ବନିମ୍ନ ଋଣ ଆକାର\’ ସମ୍ପର୍କରେ ଏସ୍ ଏଲ୍ ବିସି ବୈଠକରେ ନିଆଯାଇଥିବା ନଷ୍ପତ୍ତିକୁ ପାଳନ କରିବା ପାଇଁ ସରକାର ବ୍ୟାଙ୍କଗୁଡ଼ିକୁ ପୁଣି ଥରେ ଅନୁରୋଧ କରିଛନ୍ତି- ବିଶେଷକରି, ନୂତନ/ପ୍ରଥମ ଥର ଋଣ ପାଇଁ ୨ ଲକ୍ଷ ଟଙ୍କା, ଦ୍ୱିତୀୟ ଥର ପାଇଁ ୪ ଲକ୍ଷ ଟଙ୍କା ଏବଂ ତୃତୀୟ ଥର ପାଇଁ ୬ ଲକ୍ଷ ଟଙ୍କା । ସ୍ୱୟଂ ସହାୟକ ଗୋଷ୍ଠୀ (ଏସ୍ଏଚଜି) ମଧ୍ୟରେ ଋଣ ଓ ଉଦ୍ୟୋଗର ଚାହିଦା ବଢ଼ୁଥିବାରୁ ରାଜ୍ୟ ସରକାର ସୁଧ ଛାଡ଼ ସୁବିଧାକୁ ୩ ଲକ୍ଷ ଟଙ୍କାରୁ ୫ ଲକ୍ଷ ଟଙ୍କାକୁ ବୃଦ୍ଧି କରିଛନ୍ତି ।
ଏହି ବୃଦ୍ଧି ଦ୍ୱାରା ଉଭୟ ଗ୍ରାମାଞ୍ଚଳ ଓ ସହରାଞ୍ଚଳରେ ଥିବା ସ୍ୱୟଂ ସହାୟକ ଗୋଷ୍ଠୀଗୁଡ଼ିକୁ ବାର୍ଷିକ ୦% ପ୍ରଭାବଶାଳୀ ବାର୍ଷିକ ସୁଧ ହାରରେ ଋଣ ପ୍ରଦାନ କରାଯାଇପାରିବ । ଏହି ସୁବିଧା ସ୍ୱୟଂ ସହାୟକ ଗୋଷ୍ଠୀଗୁଡ଼ିକ ଦ୍ୱାରା ତୁରନ୍ତ ଏବଂ ନିୟମିତ ଋଣ ପରିଶୋଧ ସହିତ ଜଡିତ । ଏହା ଦ୍ୱାରା ଋଣ ପ୍ରଦାନର ହାର ବୃଦ୍ଧି ଏବଂ ଠିକ୍ ସମୟରେ ଋଣ ପରିଶୋଧ ଭଳି ଅନେକ ଫଳାଫଳ ମିଳିଛି ବୋଲି ସେମାନେ କହିଛନ୍ତି ।
ଏହାବ୍ୟତୀତ ୨୦୨୩-୨୪ ଆର୍ଥିକ ବର୍ଷରେ ବାର୍ଷିକ ୨୫୦ କୋଟି ଟଙ୍କାର ଲକ୍ଷ୍ୟ ଧାର୍ଯ୍ୟ କରାଯାଇଥିବା ବେଳେ ଚଳିତ ଆର୍ଥିକ ବର୍ଷରେ ‘ମିଶନ ଶକ୍ତି ଲୋନ୍\’ – ରାଜ୍ୟ ସୁଧ ସହାୟତା ଯୋଜନା ଅଧୀନରେ ୧୫୦.୮୩ କୋଟି ଟଙ୍କାର ସୁଧ ରିହାତି ଦାବିର ସମାଧାନ କରାଯାଇଛି । ଏହା ଦ୍ୱାରା ୨.୫୯ ଲକ୍ଷ ଯୋଗ୍ୟ ସ୍ୱୟଂ ସହାୟକ ଗୋଷ୍ଠୀ ଉପକୃତ ହୋଇଛନ୍ତି ।
ସୁଧ ସହାୟତା ଯୋଜନାର ଜଟିଳତା ବିଷୟରେ ବ୍ୟାଙ୍କଗୁଡିକ ସେମାନଙ୍କ କ୍ଷେତ୍ର କର୍ମକର୍ତ୍ତାମାନଙ୍କୁ ସକ୍ରିୟ ଭାବରେ ଶିକ୍ଷିତ କରିବାକୁ ଅନୁରୋଧ କରାଯାଇଛି ଯାହା ଦ୍ୱାରା ସ୍ୱୟଂ ସହାୟକ ଗୋଷ୍ଠୀଗୁଡିକ ଭଲ ଭାବରେ ଅବଗତ ହୋଇପାରିବେ ଏବଂ ରାଜ୍ୟର ସୁଧ ରିହାତି ପଦକ୍ଷେପ ଅଧୀନରେ ପ୍ରଦାନ କରାଯାଉଥିବା ସୁବିଧାଗୁଡ଼ିକୁ ନିରବଚ୍ଛିନ୍ନ ଭାବରେ ଉପଲବ୍ଧ କରିପାରିବେ ।
ଏହାବ୍ୟତୀତ ଅଣବ୍ୟାଙ୍କିଙ୍ଗ୍ ଏବଂ ବ୍ୟାଙ୍କ୍ ସୁବିଧା ନଥିବା ଗ୍ରାମ ପଞ୍ଚାୟତଗୁଡ଼ିକରେ ବ୍ୟାଙ୍କିଙ୍ଗ୍ ସେବା ଯୋଗାଣ ସୁନିଶ୍ଚିତ କରିବା ପାଇଁ ମିଶନ ଶକ୍ତି ବିଭାଗ ଓଜିବି, ଏସବିଆଇ, ୟୁଜିବି, ୟେସ୍, ଆଇସିଆଇସିଅ ।ଇ, ୟୁକୋ, ୟୁନିୟନ, ପିଏନବି, କାନାରା, ଆକ୍ସିସ୍, ଇଣ୍ଡିଆନ୍ ବ୍ୟାଙ୍କ, ବ୍ୟାଙ୍କ ଅଫ୍ ଇଣ୍ଡିଆ ଏବଂ ଏଚ୍ ଡିଏଫ୍ ସି ବ୍ୟାଙ୍କ ସମେତ ବିଭିନ୍ନ ବ୍ୟାଙ୍କ ସହ ରାଜିନାମା କରିଛି । ତଦନୁଯାୟୀ ମହିଳା ସ୍ୱୟଂ ସହାୟକ ଗୋଷ୍ଠୀ ଏବଂ ମହାସଂଘର ସଦସ୍ୟାମାନଙ୍କୁ ବ୍ୟବସାୟ ପ୍ରତିନିଧି ଏଜେଣ୍ଟ (ବିସିଏ) ଭାବରେ ନିୟୋଜିତ କରାଯିବ । ବର୍ତମାନ ସାରା ରାଜ୍ୟରେ ମୋଟ ୨୩୧୮ଟି ବିସିଏ କାର୍ଯ୍ୟକ୍ଷମ ରହିଛନ୍ତି, ଯାହା ଫଳରେ ଚଳିତ ଆର୍ଥିକ ବର୍ଷ (୨୦୨୩-୨୪)ରେ ୨୫୪.୫୭ କୋଟି ଟଙ୍କାର କାରବାର ସମ୍ଭବ ହେବ ।
