ଭୁବନେଶ୍ୱର: ରାତାରାତି ହଜାର ହଜାର ସଂଖ୍ୟାରେ ମାଡ଼ିଆସିଲେ । କାହା ହାତରେ ବାଉଁଶ ଠେଙ୍ଗା ତ ଆଉ କାହା ହାତରେ ଥିଲା କାଠ ଫାଳିଆ । ସକାଳ ପାଇଲା ବେଳକୁ ରାଜଧାନୀର ମୁଖ୍ୟ ରାସ୍ତାକୁ ସେମାନେ କବଜା କରିସାରିଥିଲେ । ରାସ୍ତା ଅବରୋଧ, ଧାରଣା, ପିକେଟିଂ ଆରମ୍ଭ ହୋଇଥିଲା । ସେମାନଙ୍କ ବୋଲ ନମାନି ରାସ୍ତା ମାଡୁଥିବା ଗାଡି ଆଡକୁ ଠେଙ୍ଗା ଧରି ଗୋଡ଼ାଉଥିଲେ । ରାସ୍ତା ଜାମ୍ ଯୋଗୁଁ ପିଲାଙ୍କୁ ସ୍କୁଲ ଛାଡ଼ିବାକୁ ଯାଇଥିବା ଅଭିଭାବକଙ୍କ ଘଣ୍ଟି ବାଜିଯାଇଥିଲା । କିଛି ଅଭିଭାବକ ଆତଙ୍କ ଖେଳାଇଥିବା ଡ୍ରାଇଭରଙ୍କ ଆକ୍ରମଣର ଶିକାର ହୋଇଛନ୍ତି । ସ୍କୁଲ ଛୁଟି ପରେ ପିଲାଙ୍କ ଅବସ୍ଥା ତ ଆହୁରି ସାଂଘାତିକ ହୋଇଥିଲା । ଖରାରେ ସିଝି ସିଝି ଘଣ୍ଟାଏ ଦି ଘଣ୍ଟା ବିଳମ୍ବରେ ଘରକୁ ଫେରିଲା ବେଳକୁ ପିଲା ଶେତା ପଡ଼ିଯାଇଥିଲେ ।
