ଭଞ୍ଜନଗର, ୨/୬. ଭଞ୍ଜନଗର ଥାନା ଅନ୍ତର୍ଗତ କଳିଙ୍ଗା ଘାଟିରରେ ଗୁରୁବାର ରାତିରେ ଏକ ପିକ୍ ଅପ ଭ୍ୟାନ ଭାରସାମ୍ୟ ହରାଇ ରାସ୍ତା କଡକୁ ଓଲଟି ପଡ଼ିଥିଲା।ଫଳରେ ଗାଡ଼ିରେ ବସିଥିବା ୫ଜଣ ଆହତ ହୋଇଥିଲେ।ଚିକିତ୍ସା ପାଇଁ ସେମାନଙ୍କୁ ଭଞ୍ଜନଗର ମେଡ଼ିକାଲ ରେ ଭର୍ତ୍ତି କରାଯାଇଥିଲା।ସେମାନେ ହେଲେ ବଡ଼ମ୍ବା ଥାନା ସୁନ୍ଦରିଆ ଗ୍ରାମର ଅଭୟ ସେନାପତି, ବରୁଣ ସାହୁ,ଗୋକୁଳ ସ୍ୱାଇଁ, କାବୁଲା ସେନାପତି ଓ ଚାଳକ ହେମନ୍ତ ବେହେରା ବୋଲି ଜଣାପଡ଼ିଛି।ସେଥି ମଧ୍ୟରେ ୨ଜଣଙ୍କ ଅବସ୍ଥା ଗୁରୁତର ଥିବାରୁ ଉଭୟଙ୍କୁ ବ୍ରହ୍ମପୁର ମେଡ଼ିକାଲ ସ୍ଥାନାନ୍ତର କରାଯାଇଛି।ଗାଡ଼ିଟି ଫୁଲବାଣୀରୁ ଦେଶୀ ଆମ୍ବ ବୋଝେଇ କରି ଭାୟା ଚାରିଛକ ଦେଇ ଦଶପଲ୍ଲା ରାସ୍ତାରେ ବଡ଼ମ୍ବା ଅଭିମୁଖେ ଯିବା ପରିବର୍ତ୍ତେ ଭୁଲ ବଶତଃ ଭଞ୍ଜନଗର ରାସ୍ତାରେ ଆସି କଳିଙ୍ଗା ଘାଟି ଖସୁଥିବା ବେଳେ ବ୍ରେକ ଫେଲ କାରଣରୁ ଦୁର୍ଘଟଣାଗ୍ରସ୍ତ ହୋଇଥିଲା।ଖବର ପାଇ ଭଞ୍ଜନଗର ପୁଲିସ ପହଞ୍ଚି ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ଜଣାପଡ଼ିଛି।
