ଭଞ୍ଜନଗର, : ସ୍କୁଲ ହତା ଭିତରେ ଖେଳୁଥିବା ସମୟରେ ଛାତ୍ରୀଙ୍କ ଗୋଡରେ ପଶି ଯାଇଛି ଲୁହାରଡ। ଏଭଳି ଏକ ଅଭାବନୀୟ ଘଟଣା ଘଟିଛି ଭଞ୍ଜନଗର ବ୍ଳକ୍ ଅଧୀନ ବୁଦୁଲି ସ୍କୁଲ ପରିସରରେ। ବୁଦୁଲି ଗ୍ରାମର ନଳୀନି ଭୂୟାଁଙ୍କ ଝିଅ ତଥା ସ୍କୁଲର ଦଶମ ଶ୍ରେଣୀ ଛାତ୍ରୀ କାଜଲ ଭୂୟାଁ ସାଙ୍ଗ ମାନଙ୍କ ସହ ଖେଳୁଥିବା ସମୟରେ ଖେଳ ପଡିଆ ନିକଟରେ ପଡିଥିବା ଏକ ଲୁହାରଡ଼ ତାଙ୍କ ବାମ ଜଙ୍ଗରେ ପଶି ଯାଇଥିଲା। ତାର ଚିତ୍କାର ଶୁଣି ସହପାଠୀ ଓ ଶିକ୍ଷକ ଶିକ୍ଷୟତ୍ରୀ ମାନେ ସେଠାକୁ ଦୌଡି ଆସିଥିଲେ। ଖବର ପାଇ ତାର ପରିବାର ସହ କିଛି ଗ୍ରାମବାସୀ ସେଠାରେ ପହଞ୍ଚି ଲୁହାରଡ କାଢିବା ପାଇଁ ଚେଷ୍ଟା କରିଥିଲେ। ତେବେ ରକ୍ତସ୍ରାବ ହେଉଥିବାରୁ ଅଗ୍ନିଶମ ବାହିନୀ ସହାୟତାରେ ସେହି ଭଳି ଅବସ୍ଥାରେ କାଜଲକୁ ଭଞ୍ଜନଗର ମେଡିକାଲ୍ ଅଣାଯାଇଥିଲା। ସେଠାରେ ଚିକିତ୍ସା କରାଯାଇ ଜଙ୍ଘରୁ ଲୁହାରଡ ବାହାର କରାଯିବା ସହ ଚିକିତ୍ସା ଜାରି ରହିଛି। ତେବେ ସ୍କୁଲ ପରିସରରେ ଏଭଳି ଲୁହାରଡ କିଭଳି ଆସିଲା ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଗତକିଛି ମାସ ତଳେ ବିଦ୍ୟାଳୟରେ ହୋଇଥିବା ନିର୍ମାଣ କାର୍ଯ୍ୟର ଏହି ଲୁହାରଡ ରହିଥିବା ନେଇ ଅନୁମାନ କରାଯାଉଥିବା ବେଳେ କାର୍ଯ୍ୟ ସରିବା ପରେ ତାକୁ କାହିଁକି ହଟାଗଲା ନାହିଁ ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
