ଭୁବନେଶ୍ୱର : ବିଧାନସଭାର ବଜେଟ୍ ଅଧିବେଶନ ଫେବ୍ରୁଆରି ୫ତାରିଖରୁ ଆରମ୍ଭ ହୋଇ ଫେବ୍ରୁଆରି ୧୩ ତାରିଖ ପର୍ଯ୍ୟନ୍ତ ଚାଲିବ। ଏହି ଅଧିବେଶନରେ ସମୁଦାୟ ୭ଟି କାର୍ଯ୍ୟଦିବସ ରହିବ।
ଆସନ୍ତା ଫେବ୍ରୁଆରି ୫ ତାରିଖରେ ଅଧିବେଶନର ଉଦଘାଟନୀ ଦିବସରେ ରାଜ୍ୟପାଳ ରଘୁବର ଦାସ ଉଦବୋଧନ ଦେବେ। ରାଜ୍ୟପାଳଙ୍କ ଅଭିଭାଷଣ ଉପରେ ବିତର୍କ ଫେବ୍ରୁଆରି ୭ ତାରିଖ ପର୍ଯ୍ୟନ୍ତ ଚାଲିବ।
ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ ୨୦୨୪-୨୦୨୫ ଆର୍ଥିକ ବର୍ଷର ପ୍ରଥମ ୪ ମାସ ପାଇଁ ଆସନ୍ତା ଫେବ୍ରୁଆରି ୮ ତାରିଖରେ ଅନ୍ତରୀଣ ବଜେଟ୍ ଉପସ୍ଥାପନ କରିବେ।
ଏହା ହେଉଛି ଷୋଡ଼ଶ ଓଡ଼ିଶା ବିଧାନସଭାର ଶେଷ ଅଧିବେଶନ, କାରଣ ରାଜ୍ୟରେ ସାଧାରଣ ନିର୍ବାଚନ ସହିତ ୨୦୨୪ ରେ ବିଧାନସଭା ନିର୍ବାଚନ ହେବ । ତେଣୁ ଏଥର ପୂର୍ଣ୍ଣାଙ୍ଗ ବଜେଟ୍ ପରିବର୍ତ୍ତେ ଭୋଟ୍ ଅନ୍ ଆକାଉଣ୍ଟ ରଖିବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି।
ଅନ୍ୟପକ୍ଷରେ ବିରୋଧୀ ବିଜେପି ଓ କଂଗ୍ରେସ ରାଜ୍ୟ ସରକାରଙ୍କୁ ଉପଯୁକ୍ତ ଢଙ୍ଗରେ ବଜେଟ୍ ପ୍ରସ୍ତୁତ କରିବାକୁ ଅନୁରୋଧ କରିଛନ୍ତି, ଯାହାଦ୍ୱାରା ପାଣ୍ଠିର ଅପବ୍ୟବହାର ନ ହେବ।
ବିଜେପି ବିଧାୟକ ନାଉରୀ ନାୟକ କହିଛନ୍ତି ଯେ, ବିଜେଡି ସରକାର ଅର୍ପଣ ରଥଙ୍କ ନାମରେ ପ୍ରତି ପଞ୍ଚାୟତକୁ ୨ ଲକ୍ଷ ଟଙ୍କା ଆବଣ୍ଟନ କରିଛନ୍ତି ଏବଂ ଏହି ପାଣ୍ଠିକୁ ଦଳୀୟ ପାଣ୍ଠି ଭଳି ଖର୍ଚ୍ଚ କରିଛନ୍ତି।
ସେହିପରି କଂଗ୍ରେସ ବିଧାୟକ ଅଧିରାଜ ପାଣିଗ୍ରାହୀ କହିଛନ୍ତି, ଅଧିବେଶନରେ ଧାନ କିଣା ପ୍ରସଙ୍ଗ ସମେତ ସମସ୍ତ ପ୍ରମୁଖ ପ୍ରସଙ୍ଗ ଉପରେ ଗୃହରେ ଆଲୋଚନା ହେବା ଦରକାର। ମୁଁ ଆଶା କରୁଛି ସରକାର ସବୁ ଦିଗକୁ ଅନୁଧ୍ୟାନ କରି ଏକ ସନ୍ତୁଳିତ ଜନହିତକର ବଜେଟ୍ ଆଣିବେ।
ବିଜେଡି ନେତା ତଥା ସରକାରୀ ମୁଖ୍ୟ ସଚେତକ ପ୍ରଶାନ୍ତ ମୁଦୁଲି କହିଛନ୍ତି, ରାଜ୍ୟ ସରକାର ବିଗତ ବର୍ଷଗୁଡ଼ିକରେ ବିଭିନ୍ନ ପ୍ରକଳ୍ପ ଓ କଲ୍ୟାଣକାରୀ ଯୋଜନା ପାଇଁ ପାଣ୍ଠି ଆବଣ୍ଟନ କରି ଏକ ଜନହିତକର ଓ ପ୍ରଗତିଶୀଳ ବଜେଟ୍ ଉପସ୍ଥାପନ କରିଥିଲେ। ଏହାକୁ ନେଇ ପ୍ରଶ୍ନ ଉଠାଇବା ପାଇଁ ବିରୋଧୀଙ୍କୁ କିଛି ମିଳିନଥିଲା। ଚଳିତ ବର୍ଷ ମଧ୍ୟ ଗୃହରେ ଭଲ ଅନ୍ତରୀଣ ବଜେଟ୍ ଉପସ୍ଥାପନ କରାଯିବ ବୋଲି ଶ୍ରୀ ମୁଦୁଲି କହିଛନ୍ତି।
