ଖତ ଗଦାରୁ ବାହାରିଲା ବିଡ଼ା ବିଡ଼ା ଟଙ୍କା । ହାଇଦ୍ରାବାଦରୁ ଚୋରି କରି ବାଲେଶ୍ୱର କମର୍ଦ୍ଦାରେ ଟଙ୍କା ଲୁଚାଇଥିଲେ ଅଭିଯୁକ୍ତ । ମାତ୍ର ପୁଲିସ୍ ଖୋଜାଖୋଜି କରି ଖତ ଗଦା ସମେତ ଘରୁ ବାହାର କରିଛି ୧୪ ଲକ୍ଷ ଟଙ୍କା।
ଏପରି ଏକ ଅଭାବନୀୟ ଘଟଣା ଆଜି ସକାଳେ ବାଲେଶ୍ୱର ଜିଲ୍ଲା କମର୍ଦ୍ଦା ଥାନା ବଡ଼ମନ୍ଦାରୁଣୀ ଗାଁରେ ଘଟିଛି। ବଡ଼ମନ୍ଦାରୁଣୀ ଗାଁର ରବୀନ୍ଦ୍ର ବେହେରାଙ୍କ ଘରେ ଚଢ଼ାଉ କରି ପୁଲିସ୍ ଏହି ଟଙ୍କା ଜବତ କରିଛି। ଏହି ଘଟଣାରେ ପୁଲିସ୍ ରବୀନ୍ଦ୍ର ବେହେରା ଓ ତାଙ୍କ ମା’ ବାସନ୍ତୀ ବେହେରାଙ୍କୁ ଅଟକ ରଖିଛି।
ହାଇଦ୍ରାବାଦସ୍ଥିତ ଆଗ୍ରୋ ଇଣ୍ଡଷ୍ଟ୍ରିଜ ନାମକ ଏକ କମ୍ପାନିରେ ଗୋପାଳ ବେହେରା ଗତ କିଛି ବର୍ଷ ହେବ କାମ କରୁଥିଲେ। ଇତି ମଧ୍ୟରେ ସେ କମ୍ପାନୀ ଲକର୍ର ସିକ୍ରେଟ କୋଡ ଜାଣି ଯାଇଥିଲେ। ଉକ୍ତ ଲକରରେ ୨୦ ଲକ୍ଷରୁ ଅଧିକ ଟଙ୍କା ଥିବା ବେଳେ ୧୦ ତାରିଖରେ ଗୋପାଳ ଲକରରୁ ଉକ୍ତ ଟଙ୍କା ନେଇ ଫେରାର ହୋଇ ଯାଇଥିଲେ।
