ଧାମନଗର- ଧାମନଗର ବ୍ଲକ ଅନ୍ତର୍ଗତ ଭଗବାନପୁର ପଞ୍ଚାୟତ ଶ୍ରୀ ଜଗନ୍ନାଥ ସେବା ସମବାୟ ସମିତିର ସଭାପତି ନିର୍ବାଚନ ଶାନ୍ତି ଶୃଙ୍ଖଳା ସହ ବୁଧବାର ଶେଷ ହୋଇଯାଇଛି। ଖବର ନେବାରୁ ଯାହା ଜଣାଯାଏ ସମିତିରେ ପରିଚାଳନା ପରିଷଦ ସଭ୍ୟ ପାଇଁ ଗତ ଜୁନ ମାସ ୧୯ରେ ନିର୍ବାଚନ ହୋଇଥିଲା। ୧୫ଟି ଜୋନ ମଧ୍ୟରୁ ବିଜେଡି ସମର୍ଥନରେ ୧୧ଟି ଓ ବିଜେପି ସମର୍ଥନରେ ୪ଟି ପ୍ରାର୍ଥୀ ସଭ୍ୟ ଭାବେ ବିଜୟ ହୋଇଥିଲେ। ସଭାପତି ପଦବୀ ପାଇଁ ବିଜେଡି ସମର୍ଥନରେ ଅଭିମନ୍ୟୁ ସ୍ୱାଇଁ ନାମାଙ୍କନ ପତ୍ର ଦାଖଲ କରିଥିବା ବେଳେ ଦଳରୁ ସମର୍ଥନ ନପାଇ ଅସନ୍ତୋଷ ପ୍ରକାଶ କରି ସନ୍ତୋଷ କୁମାର ମହାପାତ୍ର ନାମାଙ୍କନ ପତ୍ର ଦାଖଲ କରିଥିଲେ। ଗୋଟାଏ ଦଳରୁ ଦୁଇ ଜଣ ସଭାପତି ପଦବୀ ପାଇଁ ନାମାଙ୍କନ ପତ୍ର ଦାଖଲ କରିଥିବା ବେଳେ ବିଜେପି ସମର୍ଥନରେ କେହି ନାମାଙ୍କନ ପତ୍ର ଦାଖଲ କରି ନ ଥିଲେ। ଚଳିତ ମାସ ୧୩ ତାରିଖରେ ନିର୍ବାଚନ ପାଇଁ ବିଜ୍ଞପ୍ତି ପ୍ରକାଶ ପାଇଥିଲା। ବୁଧବାର ଅନୁଷ୍ଠିତ ହୋଇଥିବା ନିର୍ବାଚନରେ ବିଜେଡି ସମର୍ଥିତ ସଭାପତି ପ୍ରାର୍ଥୀ ଅଭିମନ୍ୟୁ ସ୍ୱାଇଁ ମାଛ ଚିହ୍ନରେ ୧୦ଖଣ୍ଡ ଭୋଟ ପାଇ ବିଜୟ ଲାଭ କରିଥିବା ନିର୍ବାଚନ ଅଧିକାରୀ ଅଚ୍ୟୁତାନନ୍ଦ ବାରିକ ସୂଚନା ଦେଇଥିବା ବେଳେ ସନ୍ତୋଷ କୁମାର ମହାପାତ୍ର ପଇଡ଼ ଚିହ୍ନରେ ୫ଖଣ୍ଡଭୋଟ ପାଇ ସନ୍ତୁଷ୍ଟ ହେବାକୁ ପଡ଼ିଛି।ଏହି ନିର୍ବାଚନରେ ଯେପରି କିଛି ଅପ୍ରୀତିକର ପରିସ୍ଥିତି ନଘଟେ ସେଥିପାଇଁ ନିର୍ବାଚନ ଆରମ୍ଭରୁ ଧାମନଗର ଏସଡିପିଓ ବିଜୟ କୃଷ୍ଣ ମହାପାତ୍ର, ଆଇଆଇସି ବନମାଳୀ ବାରିକ ସଦଳବଳେ ଶାନ୍ତି ଶୃଙ୍ଖଳା ରକ୍ଷା ନିମନ୍ତେ ନିର୍ବାଚନ ଶେଷ ପର୍ଯ୍ୟନ୍ତ ଉପସ୍ଥିତ ଥିଲେ।
