ଭୁବନେଶ୍ୱର : କରୋନା ମହାମାରୀକୁ ପରିଚାଳନା କରିବାରେ ଉଭୟ କେନ୍ଦ୍ର ଓ ରାଜ୍ୟ ସରକାର ବିଫଳ ହୋଇଛନ୍ତି । କରୋନା କଟକଣାକୁ ନେଇ ସାଧାରଣ ଜନତା ବର୍ତ୍ତମାନ ଜୀବିକା ହରାଇ ଜୀବନ ବଞ୍ଚାଇବାକୁ ସଂଘର୍ଷ କରୁଥିବା ବେଳେ ତୈଳ ଦର, ରନ୍ଧନ ଗ୍ୟାସ ଏବଂ ଅତ୍ୟାବଶ୍ୟକୀୟ ସାମଗ୍ରୀ ଦରବୃଦ୍ଧି ସାଙ୍ଗକୁ କୃଷକ ମାରଣନୀତି, ଶ୍ରମିକ ମାରଣନୀତି ଓ ଜନମାରଣ ନୀତି ସାଧାରଣ ଲୋକଙ୍କ ପାଇଁ ବୋଝ ଉପରେ ଲଳିତାବିଡ଼ା ସଦୃଶ ହୋଇଛି ।
ଏହା କେବଳ କେନ୍ଦ୍ର ଓ ରାଜ୍ୟ ସରକାରଙ୍କ ଦୂରଦୃଷ୍ଟି ଅଭାବରୁ ଦେଖାଦେଇଛି । ଏ.ଆଇ.ସି.ସି. ଅଧ୍ୟକ୍ଷା ସୋନିଆ ଗାନ୍ଧୀ ଓ ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ କରୋନା ମହାମାରୀର ସଚେତନ ନେଇ ବହୁବାର କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ କେନ୍ଦ୍ର ସରକାର ଏଥିପ୍ରତି କର୍ଣ୍ଣପାତ କରିନାହାଁନ୍ତି । ସାଧାରଣ ଜନତାଙ୍କ ସୁଖ ଦୁଃଖରେ କଂଗ୍ରେସ ରହିଆସିଛି । ଏଣୁ ସୋନିଆ ଗାନ୍ଧୀଙ୍କ ନିର୍ଦ୍ଦେଶକ୍ରମେ ପି.ସି.ସି ସଭାପତି ଶ୍ରୀ ନିରଞ୍ଜନ ପଟ୍ଟନାୟକଙ୍କ ଆହ୍ୱାନକ୍ରମେ ରାଜ୍ୟବ୍ୟାପୀ ବିଭିନ୍ନ ପର୍ଯ୍ୟାୟରେ ଆଜି ୭ ତାରିଖରୁ ଆସନ୍ତା ୧୭ ତାରିଖ ପର୍ଯ୍ୟନ୍ତ ଆନ୍ଦୋଳନ କରିବାର ନିଷ୍ପତ୍ତି ନିଆଯାଇଥିଲା ।
ଏଥିନେଇ ଆଜି ସାରା ରାଜ୍ୟରେ ପ୍ରଥମ ପର୍ଯ୍ୟାୟରେ ବିଭିନ୍ନ ବ୍ଲକ ଆଉ ସଦର ମହକୁମାରେ କଂଗ୍ରେସ କର୍ମୀ ଓ ନେତୃବୃନ୍ଦମାନେ ଅଭିନବ ଉପାୟରେ ପ୍ରତିବାଦ କରିଥିଲେ । ଏହି ଅବସରରେ ଭୁବନେଶ୍ୱର ଜିଲ୍ଲା କଂଗ୍ରେସ, ପ୍ରଦେଶ ଛାତ୍ର କଂଗ୍ରେସ, ମହିଳା କଂଗ୍ରେସ ଓ ସେବାଦଳର ମିଳିତ ସହଯୋଗରେ ଭୁବନେଶ୍ୱର ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଅଭିନବ ଉପାୟରେ ପ୍ରତିବାଦ ସଭା କରାଯାଇଥିଲା ।
ଏଥିରେ ବହୁ କଂଗ୍ରେସ ନେତୃବୃନ୍ଦ ଯୋଗଦେଇ ଝାଞ୍ଜ, ଘଣ୍ଟଣ୍ଟ, ଖଞ୍ଜଳି, ଥାଳି, ତାଟିଆ, କଂସା ଆଦି ବଜାଇ ତୈଳଦର ବୃଦ୍ଧିର ପ୍ରତିବାଦ ଜଣାଇଥିଲେ । ରାଜ୍ୟ ଓ କେନ୍ଦ୍ର ସରକାରଙ୍କ ବିଫଳତା ନେଇ ବିଶୋଦଗାର କରିଥିଲେ । ସେମାନେ କହିଥିଲେ ଏହି କରୋନା ମହାମାରୀ ବିପଦ ସମୟରେ ଉଭୟ କେନ୍ଦ୍ର ଓ ରାଜ୍ୟ ସରକାର ପେଟ୍ରୋଲ୍ ଓ ଡିଜେଲ୍ରେ ଟ୍ୟାକ୍ସ ଓ ଭାଟ୍ ବଢାଇ ତୈଳ ଦର ବୃଦ୍ଧି କରି ସାଧାରଣ ଜନତାଙ୍କୁ ଲୁଟୁଛନ୍ତି । ଏମାନେ ଜନତା ବିରୋଧି । ସେହିପରି ରନ୍ଧନ ଗ୍ୟାସ ଏବଂ ଅତ୍ୟାବଶ୍ୟକୀୟ ସାମଗ୍ରୀର ଦର ବୃଦ୍ଧି କରି ସିଧା ହାଣ୍ଡିଶାଳରେ ଚୋଟ ମାରିଛନ୍ତି ।
ଚୁଲିମୁଣ୍ଡରେ ଗୃହିଣୀଟି ଲୁହ ଗଡାଇବାରେ ଲାଗିଛି । ୨୦୧୪ ମସିହା ପୂର୍ବରୁ କଂଗ୍ରେସ ସରକାର ଥିବାବେଳେ ତୈଳଦର କିଛି ପଇସା ବଢୁଥିଲା ସେତେବେଳେ ବିଜେଡ଼ି, ବିଜେପି ରାଜରାସ୍ତାକୁ ଆସି ପ୍ରତିବାଦ କରୁଥିଲେ । ସେତେବେଳେ ପେଟ୍ରୋଲ୍ ଦର ୭୦ ଟଙ୍କା ଏବଂ ଡିଜେଲ୍ ଦର ୫୩ଟଙ୍କା ଥିଲା । ସେତେବେଳେ ଆନ୍ତର୍ଜାତିକ ବଜାରରେ ବ୍ୟାରେଲ୍ ପିଛା ୧୧୦ ରୁ ୧୪୦ ଡଲାର ଥିଲାବେଳେ ବର୍ତ୍ତମାନ ୫୦ ରୁ ୬୫ ଡଲାର ମଧ୍ୟରେ ରହିଛି । କିନ୍ତୁ ଏବେ ଦେଶ ଓ ରାଜ୍ୟରେ ଉଭୟ ପେଟ୍ରୋଲ୍ ଓ ଡିଜେଲ୍ ଲିଟର ପିଛା ୧୦୦ ଟଙ୍କା ପାର୍ କରିଗଲାଣି ।
ଏବେ ବିଜେଡ଼ି ଓ ବିଜେପି କାହିଁକି ଚୁପ୍ ଅଛନ୍ତି ବୋଲି ପ୍ରଶ୍ନ କରିଥିଲେ । ଏଣୁ ସରକାର ତୁରନ୍ତ ପଦକ୍ଷେପ ନେଇ ବର୍ଦ୍ଧିତ ତୈଳଦର ସାଙ୍ଗକୁ ରନ୍ଧନ ଗ୍ୟାସ ଏବଂ ଅତ୍ୟାବଶ୍ୟକୀୟ ସାମଗ୍ରୀର ଦର କମାନ୍ତୁ ଓ ସାଧାରଣ ଜନତାଙ୍କୁ ବଞ୍ଚିବାକୁ ଦିଅନ୍ତୁ, ଜନତା ଉଚିତ୍ ଜବାବ ଦେବେ ବୋଲି ଉପସ୍ଥିତ ଥିବା ନେତୃବୃନ୍ଦ ପ୍ରକାଶ କରିଥିଲେ । ଏହି ପ୍ରତିବାଦ ଜଣାଇବା ସମୟରେ ସେହି ରାସ୍ତା ଦେଇ ଯାଉଥିବା ସାଧାରଣ ଜନତା ସଭାରେ ଯୋଗଦେଇ ତୈଳଦର ବୃଦ୍ଧିର ପ୍ରତିବାଦର ଦୃଢ ସମର୍ଥନ କରିଥିଲେ ।
ଏହି ପ୍ରତିବାଦ ସଭାରେ ସର୍ବଶ୍ରୀ ବିଧାୟକ ସୁରେଶ କୁମାର ରାଉତରାୟ, ପୂର୍ବତନ ପି.ସି.ସି. ସଭାପତି ଶରତ ପଟ୍ଟନାୟକ, ଭୁବନେଶ୍ୱର ଜିଲ୍ଲା କମିଟି ସଭାପତି ବିଶ୍ୱଜିତ୍ ଦାସ, ଛାତ୍ର କଂଗ୍ରେସ ସଭାପତି ୟସିର୍ ନବାଜ୍, ବରିଷ୍ଠ କଂଗ୍ରେସ ନେତା ଶିବାନନ୍ଦ ରାୟ, ସୂର୍ଯ୍ୟକାନ୍ତ ସାହୁ, ଆର୍ଜନ ସାସ୍ମଲ୍, ମହମ୍ମଦ ଗୁଲାମ ପ୍ରମୁଖ ଯୋଗ ଦେଇଥିଲେ ।
